Повести, написанные по благословению святителя Макария, Митрополита Московского

В середине XVI века на Руси по благословению святителя Макария писались Жития, Похвальные слова, службы и иконы новоканонизованным святым, создавались также и другие памятники письменности и книжности. Сохранились три Повести, в которых описано нашествие крымских татар на Москву в 1521 году, большой московский пожар в 1547 году и случай церковного воровства, обнаруженного в Успенском соборе при святительстве Митрополита Макария. Святитель Макарий был очевидцем или участником событий, которые описаны в данных Повестях. Во время татарского нашествия в 1521 году он подвизался в Пафнутиево-Боровском монастыре. Пожар 1547 года имел очень бедственные последствия для Святителя, так как он перестал видеть на правый глаз. Что же касается церковного татя, то Святитель проявил милость к нему и благодаря своему авторитету настоял, чтобы его не наказывали. В Повестях упоминаются реальные люди, жившие в то время.

А. Зимин пишет о данных Повестях: “Очень близок по идейной направленности к Житиям, созданным в макарьевском окружении, цикл Повестей об иконе Владимирской Божией Матери и московском юродивом Василии Блаженном, которые принадлежат к числу источников одного из наиболее значительных обобщающих историко-литературных произведений XVI в. — Степенной книги”¹. Это нашло отражение в изложении Степенной книги², показывающей преемственность русской государственности на протяжении веков.

В первых двух Повестях прославляется современник святителя Макария — блаженный Василий, Христа ради юродивый. Из его Жития известно, что Святой молился на богослужениях, совершаемых Митрополитом Макарием. Это был один из современников Святителя, который позднее был прославлен Русской Церковью³. Третья Повесть, в которой говорится о церковном тате, характеризует Митрополита Макария как мудрого и милостивого архипастыря.

Можно говорить о публицистичности макарьевских произведений. Когда началась Ливонская война, то по благословению Митрополита Макария было написано Житие священномученика Исидора Юрьевского (†1472; пам. 8 янв.), пострадавшего там, где рати Иоанна Грозного вели в то время военные действия⁴. В контексте макарьевского времени тема борьбы с татарами была довольно актуальной. «Повесть о нашествии Магмет-Гирея 1521 года в обстановке “казанского взятья” (1552 г.) приобретала ярко выраженное патриотическое звучание. На историческом материале русско-татарских отношений первой половины XVI в. она показывала необходимость самой решительной борьбы с татарами»⁵.

Данные повести были опубликованы ранее А. А. Зиминым по рукописи начала XVII века из Рогожского собрания⁶, при этом он указал ещё четыре списка⁷. Теперь известен новый, шестой список начала XVII века из собрания Сибирского отделения Российской Академии Наук⁸. Ниже предлагается текст повестей, написанных по благословению Митрополита Макария, по данной рукописи. Необходимые при этом дополнения сделаны курсивом по публикации А. А. Зимина.

Святитель Макарий, Митрополит Московский.
Цветное изображение на камне.

[Л. 289] Знамение ужасно и преславно и како спасен бысть град Москва от нашествиа безбожных татар, иже к Богу молитвами [Л. 289 об.] Пречистыа Богородицы и великих чюдо­творцов руских и како Божиим пособием сами безбожнии погибоша вскоре. Благослови отче.

Древле убо многа и неисчетна чюдеса творяхуся от чюдотворного образа Пречистые Богоматере, иже обычей зватися икона Владимерская, егда прииде от Царяграда в Рускую землю, и в Вышеграде сугубы чюдеса показа, тако же в преименитом граде Владимере, ноипаче же в Боголюбивом царствующем граде Москве многа же от того цельбоноснаго Богоматере чюдеса не вемы како судьбами Божиими содеяшася и не писана быша, от них же многа избавлению подлежаху. [Л. 290] Сия же новейшая чюдеса Богоматере и еже во дни наша содеяшася, зде явлена быша повелением господина нашего и Пресвященнаго Макариа Митрополита всея Росии. Аще недостойни есьмы стати⁹ о сих, но по Богословию Григориа дръзнухом, яко же в книзе его пишетца сице: “Не затвори языка твоего, но возвещай людем, да разумеют, чесо ради стражем злая, им же, наказуа нас Господь Бог наш прещаше: ово же простираше стезю творя гневу Своему, овогда гладом и всяким скудством, овогда же многими недуги и болезньми и самем смертоносием, овогда же попалением огня и многими частыми [Л. 290 об.] пожары, иногда же нашествием иноплеменник сих, за небрежение наше”. Яко же бо зде в настоящей сей повести мало нечто отчасти предложитися хощет, понеже оскорбихом у Господа украдохом и мучихом и предел преступихом, да село и дом ближняго постигнем, вдовицы и сироты не помиловахом, ни мало хлеба требующим не подахом, а имеай житницы исполнены и пути смиреномудриа уклонихомся и обольстихомся в неправеднаго и возненавидехом нас речей обычающаго и разграбление убогаго в домех своих имехом и зле [Л. 291] глаголах: “Благословен Бог, яко обогатехом”. Тем же с прещением глаголет Бог: “О чада порочная! Или мните, яко бых вам поспешник на разграбление, их же ради мучити вас хощу”. Сих бо ради и приходит гнев Божий на сыны непокоривыа, его же и зде проявляа многими страшными и предивными с прещеним знаменьми, иже к нашему наказанию, паче надежа от злых избавлением молением Пречистые Богоматере и святых великих руских чюдотворцов. Таковое же прещение Божие мне же грешному известен есть образ покаяниа о сих же начало сице.

В лето 7029-е тогда содержа [Л. 291 об.] скипетр Рускаго царствиа благочестивый самодръжец Христолюбивый великий князь Василей и последи бысть во иноцех Варлам, сын пресловущаго сопостатом одолевателя самодръжавнаго великаго князя Ивана Васильевича всеа Росии самодръжца, внука великаго князя Василиа Дмитриевича. И сему благодарствено¹⁰ царствующу, но со всеми окрестными близ его царствиа царьми и кральми и со всеми дръжавными мир утвержен имеа и любовное согласие и ниоткуду брани на ся надеяшеся и сам брани тогда не составляше. Воистинну¹¹ же его людие мнози тогда во [Л. 292] своих областех без опасениа учрежахуся.

И тогда перековский царь, иже есть кримский Магмет Кирей, усмотрив си время удобно своему лукавному злохитрьству, и вместо братства мирнаго завета таинствено умысли неправедный совет з безбожным воинством своим на пленение и кровопролитие христианское. Сих же устремлением хотя Преблагий Господь наш милостивно наказати нас, яко да от грех останем и угодная Ему творити научимся и от безбожных враг злолютнаго нашествиа и конечнаго озлоблениа избавити сподобит нас своему Христоименитому достоянию. Не пред многими же деньми устремление без[Л. 292 об.]безбожных, иже ко христианским пределом мнози от правоверных могущии видети, видеша многа страшная знамения земная, от них же зде едина наречется, еже извести от славных некоих вельмож от Ивана, рекомаго Третьякова¹², иже бысть казначей царьских великого князя сокровищ, и от другаго Ивана, Боброва¹³ глаголемаго, и той бысть постельничей царьскаго же великаго князя чертога. И тако глаголаху, яко тогда мнози сподобишася видети многа ужасна видениа, страшная знамения земная с прещением гнева Божиа, вкупе же великаго милосердиа исполнение, еже показа Бог праведному угоднику Своему блаженному [Л. 293] Василию, иже самоволне обнаженному, телеснаго одеяниа не имущу, яко первозданный Адам преже преступлениа, душевною же добротою неизреченно одеянну и сугубо преукрашенному, иже многа места великиа многоболезненыа нужа претерпевая Христа ради, проходя со беззлобием богомудростное уродство воздержа, имже и наготою томя себе: лете убо солнечным зноем изгараше, зиме же яко нестерпимый мраз не врежаше огня бо и мраза силнейши плоть праведнаго сего бяше. И тако прият благодать от Бога великих чюдо[де]яней, яко егда в нощех тайно хожаше по святым церквам на [Л. 293 об.] молитву, ему же и самая церковная врата, идеже прихожаше, отверзахуся. Мнози же иноземстии гости, поведаху, яко своима очима видеша его на море ходяща връху воды, яко по суху.

Во время же бывше варварскаго устремлениа на Православие всенародное руское множество повсюду на молитву простирахуся. Тогда и сий дивный нагоходец, преподобный Василие, особь тако же моляшеся, но обаче¹⁴ тайно. И воедину от нощи пришедшу ему к велицей соборней церкви Пречистые Богородицы, идеже стояше самый чюдотворный образ Богоматере, еже есть икона Владимерь[Л. 294]ская, идеже чюдотворные мощи почиваху святых великих Руских святителей Петра, Ионы и прочих. Блаженный же ста прямо северных дверей великиа церкви вне паперти на самой земли и ту надолзе стояше унылым образом и умильным возрением и умом тайно со слезами молитвы деяше, яко да избавит Бог люди Своя от предлежащая скорби. Оле чюдеси! Иже на земли телом ходяй, умными же крилы до небеси возлетая, ему же тогда очеса умныа отверзашеся, ими же виде таинство премирно, ноипаче же велико и недоуменно ужаса исполнено многа. Весь бо восхитися умом [Л. 294 об.] к необычному зрению, не яко во сне неземным гаданием, но на яве истинно, образно явление и видит церковная врата отверзашася и чюдотворный образ Пресвятыа Богородица икона Владимерская на своем месте стоя и от нея же слышашеся глас, глаголаше сице: “Тако людие прогневаша беззлобиваго Бога, яко аз повелением Сына Своего с Рускими чюдотворцы хощем изыти из града сего”. И абие бысть яко шум велик внутрь великиа тоя церкви. Тогда бо, яко же выше реченно, неции могущии видети, видеша со Блаженным умильно видение и многа страха исполнена, яко и чюдотворную [Л. 295] икону Богоматерь изшедшу от места своего. По всей церкве всюду огнь распалашеся и всеми дверми тако же и оконцы всеми пламы изхождаху и вкупе вся церкви, яко же огнена видеся им. И абие спрятася огнь и невидим бысть. Святый же зря сиа и слезы к слезам прилагаше и сугубо молитвоваше. Сие таковое страшное видение откры Бог: в человецех умаляющеся истинну, а грехи умножающася, ими же негодование Божие сами на ся подвигохом, еже яви Бог угоднику Своему. Тако на назелно¹⁵ прещение, да быхом исправилися пред Ним покаянием и добрыми делы, да [Л. 295 об.] егда како правда, иже в нас одолеет беззаконию, и тогда пакы Господь скоро имать благодать Свою возвратити честным молением Пречистыа Своеа Матере, Ею же прошение наше всегда исполняше: нигде же бо никогда же оставляет Богородительнице помощию Своею призывающих Ея с верою, но непрестанно молится о роду крестьянском, донде же ущедрит ны Господь.

По сих же немного время мину, лукавнейший Крымский царь Магмет Кирей со множеством безбожных татар, с ним же бяше и литва в помощь, и черкасы, множество и нагайских татар, иже бяху тогда у него [Л. 296] в пленении, от них же последи и сам с прочими конечную пагубу прият, иже последи речется. Безбожнии же абие вскоре и паче безвестно злоустремительно достизают в пределы рускиа, напрасно¹⁶ же великую реку Оку преидоша грех ради наших и множество христиан победиша и плениша — мужеска полу и женска. И многи крови пролиявше, и много осквернениа содеяша, и многа села пожгоша и святые церкви и монастырь Угрешский святаго Николу разграбиша и попалиша. Мысляху окаяннии внезапу устремительно же и безстыдно достигнути и самый Богохранимый град Москву и посады [Л. 296 об.] тщахуся огнем попалити, но возбрани им Божественная сила и не попусти им Бог, не токмо озлобити или чим повредити, но ни приближитися им не да. Мы убо согрешихом к Богу и тако гнев Божий приближися на ны, его же аще не бы Господь удръжал гнев Свой ради Пречистыа Своеа Матере и святых ради угодников Своих, убо враги наши ибо¹⁷, яко пожрети нас хотяху живых (Пс 123:3), уже недалече нас приближилися бяху.

Благочестивый же самдръжец, Великий князь Василей Иванович всея Русии, видя гнев Божий простирающийся, и никто же тогда умыслити что можаше противу Божиа помощи и смири [Л. 297] себе пред Богом сокрушенным сердцем и душею болезненою, всю надежу возложи на щедроты Всемилостиваго Бога и на Пречистую Богородицу, непостыдную нашу Заступницу и на вся святыя. И поиде на Волок на Ламский, тамо ожидая к себе от Великого Новаграда великаго воинства, а инех от инуде. Но далечаго ради застояниа¹⁸ и не успеша вскоре приити к нему. И бысть тогда велие бежество и вси людие в осаду збирахуся. И тогда сам Великий князь и со всеми людьми обхождаше монастыри и ко святым церквам, тако же на единем¹⁹ прилежныа молитвы простираше к Богу, Пречистую же Богородицу [Л. 297об.] и великих чюдотворцов на помощь призывающе и всех на молитву подвизая, дабы Бог праведный гнев Свой утолил и от предлежащих враг избавил.

Пресвященный же Варлам Митрополит всея Руси тако же со святители, сущими тогда на Москве, и со всем Собором и инок множество и со всем народом²⁰ достоянием во святых церквах непрестанно Бога моляху. Людие же вси и с великою скорбию одръжими бяху и в нечаяние впадаху, яко ниоткуду же помощи имуще, разве Всесильнаго Бога и Пречистые Его Матере и великих чюдотворцов руских и всех святых, но обаче все на молитву обрати[Л. 298]шася, идеже кождо во градех и в селех всяк чин и всяк возраст единомыслено вси купнодушно сокрушенным сердцем и духом смиренным возопиша к Богу с плачем горким, яко да помилует их и от нашедшая скорби избавит и друг другу глаголаху сице: “О братие и друзи вси! Приидете возрадуемся²¹ пред Господем сотворшим нас, се бо делом²² прогневахом Его видехом. Тако подвигнемся и на милость пременити Его, вем бо, яко праведным судом наведе на ны, понеже согрешихом и беззаконновахом, обидехом и любовь далече от ближних отверзохом, нечествовахом и не оправдахом и уклонихомся от за[Л. 298 об.]поведей Божиих; “вси уклонихомся вкупе непотребни быхом” (Пс 13:3), суда правды не сотворихом, милосердиа и милость Бога нашего злобы ради и нелюбовьства нашего быхом “поношение соседом нашим” (Пс 43:14) и сице моляхуся, глаголюще: “Господи, Господи Пречистый Царю Христе Боже наш, Ты благ и долготерпелив, но мы язв достойни, елико согрешихом, биени есмы. Ты страшен и кто против станет Ти, трепет приимут от Тебе горы и величию мышца Твоея кто сравнитца? Отвратил еси лице Свое и безчестиа исполнихомся, возврати Господи от нас праведный гнев ярости Твоея и престани Господи казнити нас, [Л. 299] слыши ны Боже Спасителю наш и пощади ны милостиве и не предай же нас до конца грех ради наших. Пролей гнев Твой на языки не знающая Тебе и на царствиа, иже имени Твоего не призваша. “Мы же, людие Твои и овца пажити Твоеа” (Пс 78:13), накажи ны Господи благостию, а не яростию, да не малы сотвориши нас. Спаси нас Господи Боже наш и собери ны от язык “исповедатися имени Твоему” (Пс 141:7) святому и хвалитися в милости Твоей во вся роды и роды во веки”. И тако вси людие со усердием везде моляхуся Премилостивому Богу и Пречистой Богородици и всех святых призывающе на помощь и надежи спасениа [Л. 299 об.] не отпадаху. Иван же архиепископ Ростовский²³ тогда бысть во граде Москве и взем благословение от Митрополита Варлаама и вшед в соборную церковь и в ней же затвори себе в приделе, иже есть Похвала Святыа Богородицы. И во вся дни и нощи и во время настоящиа скорби не исходя оттуду, моляся непрестанно. Митрополит же глагола ему: “Сыну, почто не изыдеши оттуду пищу телеси приати, или како ти будет нужная потреба?”. Он же глагола ему: “Не дей мене, святый владыко, да не изыду, дондеже мимо идет гнев Господень. О пищи же и о нужной потребе ты дни радети не имам”.

И тогда бысть в Девическом монастыре [Л. 300] Христова Вознесениа, идеже великие княгини постригахуся и полагахуся, иже внутри града Москвы, в нем же живяше некая инокиня благоговейна от славна града и светла рода, иже многа лета в добродетелех проводиста, старости же достиже и бысть слепа чювственными очима, умныя же очи вельми прозрачны и добродетельны имея, ими же сподобися видети видение великое и дивное. Егда вси людие, скорбяще и Бога моляху и милости просяще, избавити от нашедших лукавнейших татар, тогда же сиа инокиня прилежныа молитвы творяше к Богу о избавлении [Л. 300 об.] предлежащая скорби. И абие отвръзошася очи ея мысленныя, вкупе же и чювственныа прилежныя, по мере же добродетели ея сподобися слышати и видети откровение преславнаго чюдеси не яко во сне, но на яве. Внезапу же слышит, яко шум велик, яко вихорь страшен, тако же и звон велик, яко площацких колоколов. Сама же, яко некоим Божественным мановением восхищена бывши посреде монастыря и видети, яко идут во Фроловские врата многосветовидный собор святолепных мужей во освященных одежах: многиа Митрополиты и с ними инех святителей [Л. 301] и прочий священный Собор и причет. И с ними же зритца, яко несом, и самый чюдотворный образ Богоматере и честные кресты и прочиа святыя иконы со Евангелии и кандилы и со свещами и с лампадами и с рипидами и со псалмы и пением. Преже сих ношахуся и церковныя хоругви и по чину видится все, яко же есть лепо соврьшитися деиству на литеи, еже есть вхождение на похрестьях²⁴, идеже яко очивесть²⁵ познаваеми бяху видением образа, яко же на иконе пишутца велиции рустии Собори: святителие чюдотворцы Петр и Алексей и Иона и Леонтие Ростовский и с ними мнози святители чюдотворцы. И тако вси со образом Богоматере и с протчею [Л. 301 об.] святынею идяху из града во Фроловские врата. Последоваху же им и народа безчисленное множества всякаго возраста мужеска полу и женскаго.

И тогда виде сиа отроковица: от Ильинскаго кресца скоро течаше муж святолепен, мнишеский образ име. Сий же бяше познаваем — великий преподобный Сергие чюдотворець. Оттуду же приспе преподобный Варлаам Футыньский чюдотворець. Сии оба купно, яко согласившеся, ускориша приити во сретение вышереченным Святителем и любезно припадаша к ногам их со слезами глаголаша: “О Богоизбраннии святии Божие Святителие, о святопомазанные главы, о [Л. 302] господие наши велиции! Не прогневайтеся на ны о нем же помолим вас, да речете нам, чесо ради исходите из града сего и камо укланяетеся и где тщитеся быти во время предлежащиа скорби на люди града сего?”. Световиднии же святителие, яко умилившеся со слезами глаголаху: “Бог повеле нам изыти отсюду, понеже людие сии, яко же сами весте, прогневаша Бога и святых Его заповедей не брегоша и страх Его презреша, учителем же не покоряхуся и прочих неподобных дел прикасаютца, яже на гнев Бога подвизают — и сих ради Бог варварский язык попусти на них. И мы убо много молихом Всесильнаго Бога, дабы утолил [Л. 302 об.] праведный гнев Свой, помиловал бы люди Своя, ноипаче же и сама Предстательница наша Пречистая Богородица непрестанно молитца о людех согрешьших. И не токмо гнева Божиа не утолихом, но и самый чюдотворный образ Богоматере повеленно есть нам изнести из града сего”. Божественная же двоица преподобных отец, Сергие и Варлаам, паче же нача к ним сугубо моление простирати; от очию своею, яко речные быстрины изливающе, глаголаху: “О богоблаженнии, пречестнии святителие! Вы есте апостольскаго жребиа наследницы, вы есте богоизбран­нии градарие и неусыпнии стражие новаго Христова винограда, иже есть [Л. 303] Рускаго царствиа, его же благочестием насади десница Господня (см. Пс 79:16) и возрасте благоверием, умно­жи Своею благостию благий Делатель Христос Бог наш. Сего добра винограда изчадие вам, Своим угодником, поручи Христос, еже снабдевати его и соблюдати, да не озоблет²⁶ его вепрь от луга, да не поясть его. Вы истиннии добрии пастырие Христова стада словесных Его овец, их же добре упасосте и ныне упасите, да не расхитят ни распудят²⁷ их лютии волчцы, злие еретицы и зловернии языцы. О блаженнии архиереи, вы есте подражателие Христолюбиа, от Него же вечному блаженству сподобистеся, молимся вам и милися деем, [Л 303 об.] не презрите и не оставляйте людей паствы вашея, их же стяжа Христос Своею кровию. Помянните, яко егда бысте кровию своею²⁸в жизни сей и како егда душа своя полагали есте за порученное вам Христоименитое стадо. И ныне ли сих, в настоящей беде сущих, безнадежных оставити хощете, их же видите, како ныне смиришася и на покаяние обращахуся и како сетующе хожаху, яко же древнии ниневитяне. И ныне убо время есть вам, еже помощи им, о блаженнии велиции светильницы и наставницы Христоименитым людем земли Рускиа. Потщитеся убо милосер[Л. 304]довати о них, усугубите пакы прилежную молитву вашу ко Всемилостивому Владыце, к Нему же убо и еще приклоните колене ваши, ноипаче же подвигните ко Господу на умоление самую непостыдную надежу Христианскую — Пречистую Богородицу, Мати бо сущи Божиа и питательница услышана будет и возможно есть праведный Его гнев на милосердие претворити. Согрешшии же людие избывше от толиких бед и разумевше премногие щедроты и долготрьпение Премилостива­го Владыкы Человеколюбца Христа Бога нашего и тако неподобных дел покаянием очистятца и исправятца и благотворение и прочее Богоугодными делы мирно и благо[Л. 304 об.]денст­вено поживут, целомудрено же и благоверно и милость получат зде и в будущем веце от Христа Бога нашего”. И ина многа преподобнии святители, яко в торжественейше уме беседующе о настоящей и соборней молитве и един единаго именем нарицаа. И абие вси купногласно и единодушно на молитву подвизашася и литию сотворше и молебныя каноны согласно пояху, на них же Евангелие прочитаху и ектении по чину глаголаху и “Господи помилуй” со слезами призывающе, пояху и молитву Пречистой Богородици пред образом Ея глаголаху и отпуст соврьшающе и креста осенением с кажением благоуханным [Л. 305] действоваху и на вся страны крестообразно благословляюще, возвратишася. И шествие паки творяху во град и с чюдотворным образом Богоматере и со всею святынею.

Преподобная же инокиня абие очютися в келии своей и потом два лета поживе очима свет видя, а преж слепа бе и с миром к Господу отиде. Сие же чюдное видение сама она инокиня извести духовному си отцу Давиду, игумену святаго Николы стараго монастыря²⁹, иже у великого торговища. Сего же не вемы, аще и ныне кто слышал от нея таковаго чюдеснаго видениа. Мнози тогда сподобишася видети, иже от многих слышашеся. [Л. 305 об.] Глаголют же и вышереченнаго казначеа Ивана Третьякова сродница, вдова бе, и та в той час в дому Ивана Третьякова бяше во единой храмине оконцем виде яве, не во сне то же видение, еже виде вышереченная инокиня. Двор же того Ивана бе близ вышереченных самех врат Фроловских, иже есть градных. Еще же и ины некие две жены вдовы благоговейны: едина супружница бывши некоего воина от града Костромы, именем Евдокиа, зовома же Коломянка; другая же бывши супружница презвитера Евсевиа, бывша служителя церкви Воздвижениа Честнаго Креста, иже у двора того же Ивана Третьякова. Жене же [Л. 306] имя Ульяна и та очима мало видя. И си две жене тогда бяху во осаде, своего дому во граде не имуще и не могуще в дому обрестися, но пребываниа людцкаго ради множества, сошедшагося во осаду, и сие две жене со инеми мноземи угнетахуся под папертию церкви святаго великомученика Георгиа, прямо церкви святаго Афонасиа у тех врат Фроловских. И сима двема женама в той же час откровено бысть от Бога видети то же неизреченное шествие из града святых Святителей и прочая же, яко же преже явлено.

Бысть же тогда ино известно явление последовательному сему дивному знамению [Л. 306 об.] на Дорогомилове, иже есть привитание и дом архиепископ Ростовских, идеже есть церковь во имя Благовещение Пречистые Богордицы над Москвою рекою. К церкви же той грядущу пономарю и внезапу же зрит по подобию, яко на иконе пишетца образ святаго святителя Леонтиа Ростовского чюдотворца, спешно текуща к церкве. И глагола ему: “Скоро отверзи церковь, да шед, в ней облекуся во священную одежу, да не умедлил бых достигнути святейших Митрополитов и прочий с ними священный Собор, иже вси идут из града сего”. Церкви же отверзеней бывши и вшед [Л. 307] в ней облечеся вборзе, яко же есть лепо во всю святительскую одежду и быстро отиде ко граду. И виден бысть от многих с протчими святители, идеже умолени быша от преподобных возвратитися им во град, яко же выше явлено есть. Глаголют же неции, яко в Дорогомиловской церкви от древних лет были священнии ризы самаго великаго святителя Леонтиа Ростовскаго чюдотворца и от того времяни не обретоша их тамо и нигде же и до ныне — на уверение чюдеси преславнаго. Оле преславнаго³⁰. О велико Божие милосердие, о немедление, печальным утешение, о чюдесное христианом избавление! [Л. 307 об.] Внегда бо людие согрешиша и токмо помышлениа обратити на покаяние и единодушно воскорбеша, и к Богу возопиша, и ко Пречистой Богородици — и в он же день видим бысть могущим видети таковое дивное милостивное вышереченное видение. И того же дни придоша вестницы: безбожнии они татарове и с поганым своим царем страхом объяти бывше и плещи давше бегу ся яша — не гоними ни от кого же, Божиа сила прогони их непостыдным предстательством Пречистыя Богородици и молитвам всех святых.

Тогда безбожный он царь Магмет Кирей со всеми своими во[Л. 308]инствы устремительно хотя нападнутие г граду Москве и преди себе посла вои, повеле у него посады пожещи, но возбрани им Божий Промысл сице: еще бо далече града бывше безбожнии посланницы и видеша полки поля³¹ безчисленнаго воинства множества руских воин, вси на конех и вооружены велми, тако же и пеших множество. Сим образом показа им Бог ангельская воинства. Татары же видевше и страх нападе на них, возвратишася и трепетни быша, приидоша ко царю своему сказаша ему, яко видеша таковое многое неизчетное множества [Л. 308 об.] воинства. Царь же удивися, и неверно вменяа и на своих посланных гневашеся и яряся и страшливы нарицая, и вскоре иных посылает. И тии паче первых ужасошася, виде бо ся им того сугубейши воинство и многою боязнию одръжми, вспять бежаша — сиа царю поведаша. Царь же недоумеяшеся, ведяше бо известно от сущих с ним пленников, яко не возможно тако вскоре снитися вкупе такову множеству рускаго воинства далечего ради разстояния. И третьее посла царь некоего от ближних своих видети, аще истинна есть поведанная ему. И шед, и виде множество рус[Л. 309]каго воинства, паче и сугубейши обоих, иже преже его посланнии видеша и скоро прибегоша к царю и трепеща глаголя: “Что косниши, о царю, побегнем борзо. И никто же ни како же того рускаго воинства изчести может и на нас быстро устремительно грядут и не вемы, если возможно нам убежати от них”. И тако страх велик нападе на них и побегоша невозвратно и бежаша друг другу глаголаху: “Бежите скорейши, бежите и не медлите, се бо руская воинства яростно дышуще гонят по нас, хотяще нас достигнути и победити”. И таковым страхом [Л. 309 об.] одръжими прибегоша во свояси, плена рускаго много с собою имуще. И во своих же улусех и кии живущая вне Перекопи — всех возгнаша во осаду в Перекопе, чающе за собою рускиа рати.

Всесильный же Бог, вскоре хотя от смерти³² кровь христианскую, поостри сердца безбожных татар к своей им погибели и тако пождательно устремишася с нагайскими татары на царство Азтороханское и взяша е. И тамо лукавнейший той царь Магмет Кирей посади на царство сына своего Баатир Салтана, сам же нача любити нагайских татар паче, нежели крымских, [Л. 310] их же близ себе дръжаше — доброхоты их себе мняше, от них же убиен бысть вскоре, не токмо сам царь, но и дети его и многие татарове крымстии избиени быша от нагай. И тако лукавнаго того царя дръжава вскоре разорися. Вся же сия содеяшася воедино лето сице: злочестивый царь и сущии с ним христианстии губителие лукавствиа ради своего вскоре погибоша. На них же збысться реченное, яко лукавнующеи потребятся, иже бо мир и любовь волею своею составляюще и завещающе и клятвами укрепляюще и лукавно и льстивно, наипаче же татством приступающи³³ и разоряюще [Л. 310 об.] мирный завет и многи неповинныа крови христианскиа проливающе сего ради вскоре и месть от Бога восприаша и низложишася”. И тако врази наши Божиею силою отгоними быша и богоранною язвою поражени быша и падоша. Нас же недостойных Премилостивый Господь Бог наш Человеколюбець наказа и от враг избави предстательством Пречистыа Своеа Матере, молением же великих чюдотворцов Петра, Алексеа и Ионы и Леонтиа и преподобных отец Сергиа и Варлама и прочих святых, иже в Росии почивших и всех святых молитвами помилова. И тако от великаго падениа [Л. 311] востави и спасе и паки спасая от всякаго зла и совръшая нас Себе люди изрядны и научая нас и направляя на истинныя пути покаяниа и на творение благоугодных Ему благодеяниа, еже раздробити алчющим хлебы свои и нищая и безкровныа собрати и наготу одети и от своих семен³⁴ не презирати и протчая заповеди Его совершати и вся, яже на пользу прошение наше душевное и телесное добывают. И да подаст нам Господь Бог наш и вечных благ наследити, да сподобит нас и нынешнее житие в мире и тишине Своею благодатию препроводити о ХристеИсусе Господе нашем, Ему же слава, честь и держава ныне и присно и во веки веком. Аминь.

О великом и о сугубом пожаре и о милостивном защи­ще­нии иже на воздусе заступлением Пречистые Богоро­дицы. Благослови отче.

[Л. 311 об.] Благочестивому и Христолюбивому и человеколюбивому Великому князю Василию Ивановичю Богом утвержаемый скипетр Рускаго царства добре и благочестно содержа веру и егда видя себе немощию одръжима, яко нечювственное смиренномудриа возлюби, желая вместо земнаго царствиа Небесное царство получити, приим иноческий образ и наречен бысть во иноцех Варлам и радостною душею Благонадежному Богу³⁵ отиде, дръжаве же своей наследника остави — богодарованнаго царя и великаго князя Иванна, суща трех лет и трех месяц. С ним [Л. 312] же дръжавствова Христолюбивая его мати Великая княгини Елена четыре лета и четыре месяца. И той к Богу отшедши, сыну же еа Великому князю Ивану оставшу юну. И тогда боляре и вельможи вси, видяще самодръжца наследника царствию юна суща, яко благополучно и сомавластно себе время видяще и изволиша собрати себе множество имениа и в место еже любити крещениа яко³⁶в ненависть уклонишася и койждо бо различных санов желаху и ничто же получаху, но обаче на мало время. И нача в них быти самолюбие и не[Л. 312 об.]правда и желая и на восхищение чюжаго имениа и воздвигоша крамолу велию межу себе³⁷ и властолюбиа. Друг друга лукавством не токмо в заточениа посылаху, или в темницах затворяху и юзами облагаху, но и самой смерти предаваху, навыкше господоубийственному совету, иже прежде в полатах умориша и самех дву царских отраслей: князя Георгиа и князя Андреа Ивановичев³⁸. Тако же и сами на своих другов востающая различными смертьми скончавшеся и домы их и села наследоваша. И от похищениа чюжаго имениа домы их [Л. 313] наполнишася и сокровища их неправеднаго богатства умножишася, не токмо же сие едина содеваху, но и великим славам сподобишася³⁹: дву Митрополитов святительскаго престола лишиша — Данила и Асафа праведне учащих и обличающих их. Но понеже Богу сице извольшу.

И бысть по сих престолу их приити извольшу и ко Пресвященнейшу Митрополиту дивну Макарию. Многа же нестроениа тогда содевахуся, даже до самого возраста царска, дондеже царским венцем венчася того же Пресвященнаго рукою Макариа Митрополита всеа Русии и законному браку приобщищася. Человеколюбивый же Бог, милосердием Своим долготерпяй о наших согрешениих, ожидая [Л. 313 об.] нашего покаяниа и не хотя конечной пагубе предати нас, яко да престанем от злоб и не уповаем на неправедное богатство, еже вскоре минуетца, яко же пишет Григорие Богослов: “Яко милость от Бога от Бога (!) меритца по добродетели человечестей, тако и гнев по мере прямо грехов наводит Бог, яко и самая тварь Творцу служащи благодействует на Бога уповающим грешным же на мучение прелагаетца, понеже грешный, аще зде не мучитца, то им блюдетца вечное мучение, а иже зде мучитца, той врачюетца, яко же и зде прилагаетца бывшая язва от Бога, ею же грехи человеческиа милостивне врачюя [Л. 314] Господь”. Вышереченное неправедное богатство собранное, огнем потребишася вкупе с неправедным имением и праведнаго стяжаниа множество огнем пояде, сице попустившу Богу востязаниа на нас от всякаго греха, да быхом престали и на покояние обратилися, иже бысть в лето 7056-го месяца апреля в 12 день во вторник светлыя недели во граде Москве.

Грех ради наших Великий торг загореся и много товара погоре и многиа святыа церкви и дворов множество и имениа безчисленна згоре, мала часть остася в Новейшем граде Москве. Таков пожар попусти Бог, яко да приимут людие наказание и страх Господень обыдет их, поболят о гресех и зачнут покаяние и родят [Л. 314 об.] не плод истлениа, но дух спасениа, яко же той Богослов глаголет: “Яко же пестун взем детище преж по малу учится, тако и Бог малыми бедами наказуя ны. Аще ли же не исправимся пред Ним, то и большими бедами томя нас, да престанем зло творяще, яко же и с прещением глаголет Господь: “Наказати наведох на вы раны кроткиа⁴⁰: десять язв египетц­ких — наведох град и удержах дождь и земли стужих, а злобы вашея не сокруших. Вем, яко род жесток есть и непокорив и жила железна выя их и⁴¹ язвами гнева Моего не наказастеся Моими, не подкланастеся волям и мнитеся, яко не может рука Моя инех нанести язв. У Мене горящее углие от копотные пещи, еще же и прузи, ими же Египта казних и тма, [Л. 315] пытаема первенец люто и пагуба. И аще от сих не накажетеся и пойдете ко Мне вопреки и Аз пойду к вам с яростию вопреки же”. Мы тако милостивно от Бога наказаеми ни мало исправихомся.

И паки вскоре попусти Бог быти зельнейшему пожару о нем же откровенно бысть прежде единаго дни праведному Василию, иже Христа ради юродивому рекомому нагому, не имеяше бо на телесе своем ни единаго рубища лете же убо от солнечнаго зноя обгараше, зиме же многоболезненою студению тръпяше внегда и самой земли от зельнаго мраза разседатися, он же, яко бесплотен подвизашеся по улицам преходяще, многи скорби [Л. 315 об.] претерпевая и о телеси не радяше и во храмине теплей греятися не требоваше: Божиа бо благодать греаше его, яко же огнем — в первом слове явленно есть. И сей блаженный Василий по прежереченном пожаре, в том же лете некогда в полудне прииде на монастырь Воздвижениа Честнаго Креста, иже зоветца на Острове, и ста пред церковью, к ней же умильно святый зря, умную молитву действуя и плача неутешно. Людие же видевше и помышляху, что есть вина плача его? Последи же разумевше, о нем же плакаше блаженный, яко провидети тогда: хотяще быти пожар велий.

Во утрий день месяца (?) июля в 21 день во осьмый час дни грех ради наших загореся церковь Воздвижение [Л. 316] Честнаго Креста на Острове, оттуду же разыдеся огнь на многие улицы. И тогда попусти Бог бури зельней, яко великим древесем и забралом и храмом многим от самыя земли от основаниа взимашеся и на высоту возношахуся и всюду разметахуся. Огнь зельне разпалашеся и всюду пламы великиа, яко горы и яко тученосныя облаки особь ношахуся и многиа домы и святыя церкви яростно пожигая. И выгоре все Занеглиннее, и Великий посад, и во обоих градех — в старом и в новом — церкви и дворы, и Великий торг, яко в мегновении ока вся испепелишася. Тако нас наказует Господь и врачуя [Л. 316 об.] и яко многое богатство потребишася, иже от неправды собранныя, не токмо же древяная зданиа, но и самое камение разпадашеся и железо разливашеся и во многих каменных церквах и в полатах все выгоре. Ноипаче же жалостнейша сего, яко и самыя церковные священные вещи и многиа святыни, иже в похвалу Самому Богу и Пречистой Богородици и всем святым в различных потребах хитроустрояемое — во един час огнем потребишася. Вкупе же с неправедным богатством и праведнаго имениа безчисленно множество поги­бе — всего же дражайше, иже множество безценнаго узорочья древняа различия и многоцерковныя [Л. 317] утвари и прочия неизреченныя и памяти достойныя вещи, еще же и царскиа, драгиа и преславныа, иже от древних лет многиа от прародителей стяжаниа же и во святых церквах Божественныя иконы и честныя кресты, ноипаче же многиа мощи святых и святыя многиа книги греческиа и рускиа, дивно преизрядно украшенныя ризы и одежды и сосуды драгиа, злата же и сребра и драгаго жемчугу и камениа многоценнаго и прочая неизреченныа и неудобь сказанныя всякия кузни. И вся сия безвести быша, яко же древле Боговидець Моисей самыя Богописанныа скрыжали не пощаде, но вся яростию сокруши, понеже [Л. 317 об.] израильтяне прогневаша Бога. Мы же много, не престая, согрешаем и тако сами на собя гнев Божий наведохом, яко и всякоя святыня Своея не пощаде Бог, но огню предаде — таковым страшным уязвением нас обновити хотя покаянием.

Тогда же в той великий пожар пресвященный Макарей Митрополит всея Русии бысть во церкви соборней Пречистые Богородици, с ним же в церкви той велицей протопоп именем Гурие и инии мнози моление творяще к Богу и Пречистой Его Матере и великим чюдотворцом и всем святым. Пламени же велику всюду обдержащу, яко и самыя тоя великиа церкви [Л. 318] кровля вся огоре, у церкви же той паперть каменная от великаго огня распадеся, внутрь же церкви той зной неистерпим бысть. Митрополит же великий изнеможе, его же едва выведоша из церкви. Он же взем с собою образ Богоматере, его же великий чюдотворец Петр Митрополит написал своею рукою, и книгу Божественнаго правила, юже Кипреян Митрополит принес из Царяграда⁴².

Великий же чюдотворный образ, иже есть икона Владимерская, его же хотяху изнести из церкви и не возмогоша его ни двинути от места, идеже стояше. Сама Богомати, сохраняя бяше и соблюдая, [Л. 318 об.] не токмо свой Пречистый образ и всю церковь, но и всего мира покрывая и соблюдая от всякаго зла. В церкви же той велицей внутрь, аще и велику зною сущу, огненныа силы и непостояннаго огня онаго, но ни дымная воня не прикоснуся нигде же велицей церкви — покровом и защищением Пречистыя Богородицы и молитвами великих чюдотворец. Тако Пречистая Богородица неотступно пребывающи и спасающи нас от всех зол, находящих на ны. Тако бо согрешихом и Божие незлобие раздражихом, аще не бы Всемилостивая Пречистая Богородица Своим предстательством возвратила предве[Л. 319]чный⁴³ гнев Божий, убо яко кончина приближитися хотяше. Тако Богомати наша заступница преславно избавляя нас от толиких бед и чюдно показуя Себе на воздусе стояща и молящися о нас к Сыну Своему и Богу нашему и от то (!) огня защищающая нас.

Тогда бо мнози многа преславная видевша видениа, от них же нечто вмале речется, еже сподобися видети человеку некоему от срачин новопросвещену святым Крещением, иже прежде татарин бе. И той виде тогда великий той пожар: огненыа пламы до облак возходяща и всюду свирепо [Л. 319 об.] с зельным вихром развивающи и вся пожигающи. Он же недоумеюще о толицей беде и мняще последнюю кончину видети, от зельнаго того огня уклоняющуся ему семо и овамо и вне града⁴⁴ стоящу и всюду со ужасом зрящу ему. И тогда умная очеса отверзошася ему и внезапу зрит явствено выспрь соборныя церкви, идеже есть Владимерская чюдотворная икона Пречистая Богородица, и виде Ю на воздусе стоящу прямо самыя тоя церкви над самым връхом Пречистую Богородицу, яко же и обычай имать пресветлы багряны ризы имущи и молящися о нас Сыну Своему и Богу нашему [Л. 320] и ризами Своими, яко махая и осеняя и свирепство непостояннаго огня утоляющи. Таковое видение великое и чюдное удивление достояния⁴⁵ откры Бог очивесть (!) прозрачно преславное зрение новопросвещену мужу на уверение истиннаго благочестиа, яко же рече Апостол: “Знамения бывают не ради верных, но неверных ради”. Он же недоумеяше о видении, и многим людем, сущим ту бывшим с ним, поведа, яже видяше, и выспрь показа им, иже и мнози видеша то же пречюдное явление на воздусе Пречистые Богородицы во образе Пресветые [Л. 320 об.] Жены в багряны ризах. И таковым Богоматери милостивным заступлением нача гнев Божий утолятися и пламы огненыя умалятися и остаточные домы с храмом великий огнь близ бяше и не прикасашеся их и не врежени быша и тако преста пожар.

И тогда же бысть чюдо за великим торгом в Новом граде, в рекомом Китае, близ соленаго двора, в дому некоего подиачего зовомый Третьяк Теплый, у него же образ бяше, стояше во единой храмине древяной. И во оба великие те пожары оба полы близ храмины тоя погореша вси дворы во граде, [Л. 321] той же храм среди пламени не врежен бысть, идеже стояше образ Богоматере. И ныне же той чюдесный образ поставлен бысть во церкви Зачатие святые Анны, от него же Пречистая Богородица с Своим предстательством возвратила праведный гнев Божий, убо при кончине быхом. Тако бо попустившу, яко малы части остася, идеже не выгоре. Тако нас Пречистая преславно избавляя и чюдно спасая и в разум истинный обращая. Вси же людие умилишася и на покаяние уклонишася от главы и до ногу, яко же сам благочестивый царь, тако же вельможи его и до простых людей. [Л. 321 об.] И вси сокрушенным сердцем первая греховная дела возненавидевше и вси тщахуся и обгчевахуся⁴⁶ Богу угодная дела творити, елико кому возможно. Милосердый же Бог, виде толикое смирение и сокрушение сердечное и благое произволение людей Своих, и праведный гнев Свой и ярость отврати от них и паки благослови и обнови их благословением благостынным [Ë. 323]⁴⁷è ìèëîñòü Ñâîþ óìíîæè íà íèõ è âñякая требованиа и богатство и утвари драгиа велико сугобо дарова им. И по страшном том пожаре летом единем святыа церкви поставлены прекрасны и освящени и украшени быша паче перваго и домы царскиа и людцкиа устроены быша изряднее перваго и различныя имения их усугубишася [Л. 323 об.] и всякаго блага исполнишася. И в прочая лета благодать Божиа растяше и множашеся во всей дръжаве благочестиваго царя и великаго Ивана Васильевича всеа Русии самодръжца предстательством и молитвами Пречистые Богородицы Заступницы нашей и великих чюдотворцов руских и всех святых аминь.

Чюдо о тати великия церкви соборныя Пречистыя Богородицы честнаго Ея Успения царствующаго града Москвы. Благослови отче.

В боголюбивом и благоденьственном царствующем граде Москве человек некто художеством каменосечець, вражиим навождением умысли татбу содевати и сим приобрести неправедное богатство. И вниде некогда в великую соборную церковь Пречистые Богородицы преименитыя Руския Митрополия во время вечерняго пения и виде многую драгую утварь у святых икон, и от памраченнаго ума розгореся сердце его на крадение святаго таковаго безценнаго узорочья. По отпущении же вечерняго пения всем людем исшедшим вон из церкве, он же приниче пот пещь отроческую и ту скрыся тайно, метлами загородися и скамейцами малыми. Стражи же церковныя по всей церкви обоглядовавше и никого же чвяху во церкви и вон изыдоша. Нощи же наставшей, изыде тать от сокровеннаго места и прииде к чюдотворному образу иконы Владимерския, пред нею же всегда в день и в нощь светилник неугасим пребываше. Видев же киот замечен, идеже чюдный той образ Богоматере стояше, близ же того киота стояше рака сребрена, образом яко церквица, в ней же стояше икона Пречистая Богородица, юже великий чюдотворец Пресвященный Митрополит Петр [Л. 322] священныма рукама написал, о ней же сведетельства довольна имать в Житии самого того святейшаго чюдотворца Петра.

Помышляше же тать он у того чюдотворнаго образа златую утварь похитити и многочюдотворнаго гроба чюдотворца Петра тако же помышляше злато ломати. И абие слышит во святем олтаре, яко шум необычен бяше и видит от северных дверей и из олтаря идуща мужа святолепна и белообразующася и близ к нему пришедша, яко ударити татя хотяще. Тать же внезапу паде на землю и на мног час лежаше, яко мертв. [Л. 322 об.] И едва очютися и востав не ведый камо ити или где скрытися и хожаше по церкви. И прииде к той же пещи отрочестей и уклонися под пещь и тамо закрыся метлами и скамейцами, дабы невидим был от хотящих внити на утренее пение в церковь. Приспевшу же времяни заутрени, прииде ключарь и отмкнув церковь и со стражми церковными внидоша в церковь и помолившеся и начаша обходити по церкви и всюду обглядаху, яко же творяху. И приидоша к предиреченной пеще и видеша не по обычаю много скамей и метлы сограмождены у пещи. И осве[Л. 323]тиша свещею под пещ и изыде тать, трепеща, держа в руце ножь и мех. И повеле ключарь исторгнути от руку его ножь и вопроси его: “Ты кто еси?”. Он же поведа себе, яко тать есмь. И сказа все приключившеся ему и ста яко изумлен. И в той час вниде в церковь к пению заутреннему и сам Пресвященный Макарий Митрополит всея Русии и поведаша ему, яко татя обретоша во церкви, и сказаша ему вся приключившаяся ему во церкви той велицей. Макарие же Митрополит не повеле ему зла сотворити никоего же, повеле без вреда из церкви извести его вон. Судии же земъстии хотяху взяти его и по градцкому закону судити ему и на Митрополита роптаху, глаголюще, яко отпусти злодея, суда не сотворихом ему, ни градцким не посла его. Макарий же Митрополит глагола им всем со прещением, заповеда, да не судят его никако же. И стража церковнаго посла и повеле ему проводити его вне града без пагубы. Тать же прииде на Кулишки близ церкви Всех святых и нача ходити семо и овамо, глядоше, яко неистов. Такоже и вопити нача многими нелепыми козлогласовании скотьскими и песьими и, тако вопия, душу испусти. Нецыи же роптаху на Митрополита и на ключарей, яко тако просто пущен бысть тать церковный. Митрополит же о сих никако же стужи си, но и тело его повеле погребению предати. О нем же писание збыться, глаголюще: “Моя месть, Аз воздам”, — глаголет Господь(Рим 12:19) (СО РАН ИИФиФ. № 4/72. Сборник Житий. XVII в.).

Список сокращений