По Божественной литургии, священнику, стоящу в святилище, предстоят хотящии спрягатися пред святыми дверьми: муж убо одесную, жена же ошуйюю. Лежать же на десней стране святыя трапезы перстни их два, златый и сребряный, сребряный убо уклоняяся к десным, златый же к левым, близ друг друга.
Священник же назнаменует главы новоневестных трижды, и дает им свещи возжжены, и введь я внутрь храма, кадит крестовидно, и глаголется от диакона: Благослови владыко.
Священник: Благословен Бог наш всегда ныне и присно и во веки веков.
Хор: Аминь.
Диакон: Миром Господу помолимся
Хор: Господи, помилуй.
Диакон: О свышнем мире и спасении душ наших Господу помолимся.
Хор: Господи, помилуй.
Диакон: О мире всего мира, благостоянии Святых Божиих Церквей и соединении всех Господу помолимся.
Хор: Господи, помилуй.
Диакон: О святем храме сем и с верою, благоговением и страхом Божиим входящих в онь Господу помолимся.
Хор: Господи, помилуй.
Диакон: О Великом Господине и Отце нашем Святейшем Патриархе Алексии, о Господине нашем Преосвященнейшем митрополите (или: архиепископе, или: епископе) (имя рек), честнем пресвитерстве, во Христе диаконстве, о всем причте и людех Господу помолимся.
Хор: Господи, помилуй.
Диакон: О Богохранимей стране нашей, властех и воинстве ея Господу помолимся.
Хор: Господи, помилуй.
Диакон: О граде сем (или: веси сей; если в монастыре, то: о святей обители сей), всяком граде, стране и верою живущих в них Господу помолимся.
Хор: Господи, помилуй.
Диакон: О рабе Божием (имя жениха) и рабе Божией (имя невесты), ныне обручающихся друг другу, и о спасении их, Господу помолимся.
Хор: Господи, помилуй.
Диакон:О еже подати сим чадам в приятие рода, и всем яже ко спасению прошением, Господу помолимся.
Хор: Господи, помилуй.
Диакон:О еже низпослатися им любви совершенней, мирней, и помощи, Господу помолимся.
Хор: Господи, помилуй.
Диакон:О еже сохранитися им в единомыслии и твердой вере, Господу помолимся.
Хор: Господи, помилуй.
Диакон:О еже благословитися им в непорочном жительстве, Господу помолимся
Хор: Господи, помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш (всю жизнь нашу) Христу Богу предадим.
Хор: Тебе, Господи.
Иерей: Яко подобает Тебе всякая слава, честь и поклонение. Отцу, и Сыну, и Святому Духу, ныне и присно, и во веки веков.
Хор: Аминь.
Иерей: Боже вечный, разстоящаяся собравый в соединение, и союз любве положивый им неразрушимый: благословивый Исаака и Ревекку, и наследники я Твоего обетования показавый: Сам благослови и рабы Твоя сия (их имена) наставляя я на всякое дело благое. Яко Милостивый и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков, аминь.
Хор: Аминь.
Иерей: Мир всем
Хор: И духови твоему.
Иерей: Главы ваша Господеви приклоните
Хор: Тебе Господи
Иерей: Господи Боже наш, от язык предобручивый Церковь деву чистую, благослови обручение сие, и соедини, и сохрани рабы Твоя сия в мире и единомыслии. Тебе бо подобает всякая слава, честь и поклонение, Отцу, и Сыну, и Святому Духу, ныне и присно, и во веки веков. Аминь
Теперь священник берет перстни и дает мужу златый, а серебряный жене, говоря: «Обручается раб Божий (имя) рабе Божией (имя), во имя Отца, и Сына, и Святаго Духа, аминь».
Затем здесь говорится: «И егда речет на едином коемждо трижды, творит крест перстнем на главах их: и налагает я на десных их перстах. Таже изменяет перстни новоневестных восприемник». Невеста получает перстень жениха, а жених — перстень невесты. Раньше полагалось на этих перстнях писать имена, так что на руке у мужа был перстень с именем жены, а на руке у жены перстень с именем мужа.
Иерей: Господу помолимся.
Господи Боже наш, отроку Патриарха Авраама сшествовавый в средоречии, посылая уневестити господину его Исааку жену, и ходатайством водоношения обручити Ревекку открывый: сам Благослови обручение рабов твоих, сего (имярек), и сея (имярек), и утверди еже у них глаголанное слово: утверди я еже от тебе святым соединением: ты бо из начала создал еси мужеский пол и женский, и от тебе сочетавается мужу жена, в помощь и в восприятие рода человеча. Сам убо Господи Боже наш, пославый истину в наследие твое, и обетование твое на рабы твоя отцы наша, в коемждо роде и роде избранныя твоя: призри на раба твоего (имярек), и на рабу твою (имярек), и утверди обручение их в вере и единомыслии, и истине, и любви. Ты бо Господи показал еси датися обручению и утверждатися во всем. Перстнем дадеся власть Иосифу во Египте: перстнем прославися Даниил во стране Вавилонстей: перстнем явися истина Фамары: перстнем отец наш Небесный щедр бысть на Сына своего: дадите бо, глаголет, перстень на десницу его, и заклавше тельца упитаннаго, ядше возвеселимся. сама десница твоя Господи, Моисеа вооружи в чермнем мори: словом бо твоим истинным Небеса утвердишася и земля основася, и десница раб твоих Благословится словом твоим державным, и мышцею твоею высокою. сам убо и ныне Владыко, благослови перстней положение сие Благословением Небесным: и ангел твой да предыдет пред ними вся дни живота их. Яко ты еси Благословляяй и освящаяй всяческая: и тебе славу возсылаем, отцу, и Сыну, и святому Духу, ныне и присно, и во веки веков, аминь.
Хор: Аминь
Диакон: Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй (трижды).
Диакон: Еще молимся о Великом Господине и Отце нашем Святейшем Патриархе Алексии, и о Господине нашем Преосвященнейшем (имя рек правящего епископа), и всей во Христе братии нашей.
Хор: Господи, помилуй (трижды).
Диакон: Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Хор: Господи, помилуй (трижды).
Диакон: Еще молимся о братиях наших, священницех, священномонасех и всем во Христе братстве нашем. Хор: Господи, помилуй (трижды).
Диакон: Еще молимся о рабех Божиих (имярек), и (имярек), обручающихся друг другу. Лик: Господи помилуй, трижды.
Еще молимся за всю братию, за вся православныя христианы:
Хор: Господи, помилуй (трижды).
Священник: Яко милостив и Человеколюбец Бог еси, и Тебе славу возсылаем, Отцу, и Сыну, и Святому Духу, ныне, и присно, и во веки веков.
Хор: Аминь.
Чин Венчания
После отпуста чина обручения следует последование венчания. «Аще убо хотят в тожде время венчатися, входят во храм со свещами возжженными, предыдуще священнику с кадильницею, и поющу псалом 127.
Иерей: Блажени вси боящиися Господа, ходящии в путех его. Труды плодов твоих снеси. Блажен еси, и добро тебе будет. Жена твоя яко лоза плодовита, во странах дому твоего. Сынове твои яко новосаждения маслична, окрест трапезы твоея. Се тако Благословится человек бояйся Господа. Благословит тя Господь от сиона, и узриши благая Иерусалима вся дни живота твоего. И узриши сыны сынов твоих: мир на Израиля.
Хор на каждый стих: Слава Тебе Боже наш, слава Тебе.
Поется псалом, вернее, его читает обычно священник после слов «Слава Тебе Боже наш, слава Тебе». Но здесь есть еще примечание: «Посем глаголет иерей поучительное слово, сказуя им (то есть жениху и невесте), что есть супружества тайна: и како в супружестве богоугодно и честно жительствовати имут. По скончании же слова, воспрошает иерей жениха, глаголя…»
После такой проповеди священник должен спросить жениха: «Имаши ли (имя), произволение благое и непринужденное, и крепкую мысль, пояти себе в жену сию (имя), юже зде пред тобою видиши». И жених отвечает: «Имам, честный отче». И священник дальше спрашивает: «Не обещался ли еси иной невесте». И жених отвечает: «Не обещахся, честный отче».
Потом такой же вопрос обращен к невесте: «Имаши ли произволение благое и непринужденное, и твердую мысль, пояти себе в мужи сего (имя), егоже пред тобою зде видиши» и «Не обещалася ли еси иному мужу».
Таже глаголет диакон: Благослови владыко.
Священник: Благословенно Царство Отца и Сына и Святаго Духа ныне и присно и во веки веков, аминь
Лик: Аминь.
Диакон: Миром Господу помолимся
Хор: Господи, помилуй.
Диакон: О свышнем мире и спасении душ наших Господу помолимся.
Хор: Господи, помилуй.
Диакон: О мире всего мира, благостоянии Святых Божиих Церквей и соединении всех Господу помолимся.
Хор: Господи, помилуй.
Диакон: О святем храме сем и с верою, благоговением и страхом Божиим входящих в онь Господу помолимся.
Хор: Господи, помилуй.
Диакон: О Великом Господине и Отце нашем Святейшем Патриархе Алексии, о Господине нашем Преосвященнейшем митрополите (или: архиепископе, или: епископе) (имя рек), честнем пресвитерстве, во Христе диаконстве, о всем причте и людех Господу помолимся.
Хор: Господи, помилуй.
Диакон: О Богохранимей стране нашей, властех и воинстве ея Господу помолимся.
Хор: Господи, помилуй.
Диакон: О граде сем (или: веси сей; если в монастыре, то: о святей обители сей), всяком граде, стране и верою живущих в них Господу помолимся.
Хор: Господи, помилуй.
Диакон: О рабе Божием (имя жениха) и рабе Божией (имя невесты), ныне обручающихся друг другу, и о спасении их, Господу помолимся.
Хор: Господи, помилуй.
Диакон:О еже подати сим чадам в приятие рода, и всем яже ко спасению прошением, Господу помолимся.
Хор: Господи, помилуй.
Диакон:О еже низпослатися им любви совершенней, мирней, и помощи, Господу помолимся.
Хор: Господи, помилуй.
Диакон:О еже сохранитися им в единомыслии и твердой вере, Господу помолимся.
Хор: Господи, помилуй.
Диакон:О еже благословитися им в непорочном жительстве, Господу помолимся
Хор: Господи, помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш (всю жизнь нашу) Христу Богу предадим.
Хор: Тебе, Господи.
Иерей: Яко подобает Тебе всякая слава, честь и поклонение. Отцу, и Сыну, и Святому Духу, ныне и присно, и во веки веков.
Хор: Аминь.
Иерей: Боже Пречистый, и всея твари содетелю, ребро праотца Адама за Твое человеколюбие в жену преобразивый и благословивый я, и рекий: раститеся и множитеся, и обладайте землею, и обою ею един уд показавый сопряжением: сего бо ради оставит человек отца своего и матерь, и прилепится жене своей, и будет два в плоть едину: и яже Бог спряже, человек да не разлучает. Иже раба Твоего Авраама благословивый и разверзый ложесна Саррина, и отца множества языков сотворивый: иже Исаака Ревекке даровавый, и рождество ея благословивый: иже Иакова Рахили сочетавый, и из него дванадесять патриархов показавый: иже Иосифа и … спрягий, плод детотворения им, Ефрема и Манассию даровавый: иже Захарию и Елисавете приемый, и Предтечи рождение им показавый: иже от корня Иессеева по плоти израстивый Приснодеву, и из Нея воплотивыйся, и родивыйся во спасение рода человеческаго, иже за неизреченный Твой дар и многую Благость, пришедый в Кану Галилейскую, и тамошний брак Благословивый: да явиши, яко Твоя воля есть законное супружество, и еже из него чадотворение. Сам Владыко пресвятый, приими моление нас рабов твоих, якоже тамо, и зде пришед невидимым твоим предстательством, Благослови брак сей, и подаждь рабом твоим сим, имярек, и имярек, живот мирен, долгоденствие, целомудрие, друг ко другу любовь в союзе мира, семя долгожизненное, о чадех Благодать, неувядаемый славы венец. Сподоби я видети чада чадов, ложе ею ненаветно соблюди, и даждь има от росы Небесныя свыше, и от тука земнаго: исполни домы их пшеницы, вина и елеа и всякия благостыни, да преподают и требующим, даруя купно и сущим с нима вся яже ко Спасению прошения. Яко Бог милости, и щедрот, и человеколюбия еси, и Тебе славу возсылаем, со безначальным Твоим Отцем, и Пресвятым, и Благим, и животворящим Твоим Духом, ныне и присно, и во веки веков.
Хор: Аминь.
Диакон: Господу помолимся.
Хор: Господи помилуй.
Иерей: Благословен еси Господи Боже наш, иже тайнаго и чистаго брака Священнодействителю, и телеснаго Законоположителю, нетления Хранителю, житейских благий Строителю: сам и ныне Владыко, в начале создавый человека, и положивый его яко царя твари, и рекий: не добро быти человеку единому на земли, сотворим ему помощника по нему: и взем едино от ребр его, создал еси жену, юже видев Адам, рече: сия ныне кость от костей моих, и плоть от плоти моея: сия наречется жена, яко от мужа своего взята бысть сия. Сего ради оставит человек отца своего и матерь, и прилепится жене своей, и будета два в плоть едину: и яже Бог сопряже, человек да не разлучает. сам и ныне Владыко Господи Боже наш, низпосли Благодать твою Небесную на рабы твоя сия, имярек, имярек: и даждь рабе сей во всем повиноватися мужу, и рабу твоему сему быти во главу жены, яко да поживут по воли твоей.
Благослови я Господи Боже наш, якоже благословил еси Авраама и Сарру:
Благослови я Господи Боже наш, якоже Благословил еси Исаака и Ревекку:
Благослови я Господи Боже наш, якоже благословил еси Иакова, и вся патриархи:
Благослови я Господи Боже наш, якоже благословил еси Иосифа и Асенефу:
Благослови я Господи Боже наш, якоже Благословил еси Моисеа и Сепфору:
Благослови я Господи Боже наш, якоже Благословил еси Иоакима и Анну:
Благослови я Господи Боже наш, якоже Благословил еси Захарию и Елисавет.
Сохрани я Господи Боже наш, якоже сохранил еси Ноя в ковчезе:
сохрани я Господи Боже наш, якоже сохранил еси Иону во чреве китове.
Сохрани я Господи Боже наш, якоже сохранил еси святыя три отроки от огня, низпославый им росу с Небесе: и да приидет на ня радость оная, юже имяше Блаженная елена, егда обрете честный Крест.
Помяни я Господи Боже наш, якоже помянул еси Еноха, Сима, Илию.
Помяни я Господи Боже наш, якоже помянул еси святыя твоя четыредесять мученики, низпославый им
с Небесе венцы.
Помяни Боже и воспитавшия их родители: зане молитвы родителей утверждают основания домов. Помяни Господи Боже наш, рабы твоя уневестившияся, сшедшияся в радость сию.
Помяни Господи Боже наш раба твоего, имярек, и рабу твою, имярек, и Благослови я. Даждь им
плод чрева, доброчадие, единомыслие душ и телес: возвыси я яко кедры ливанския, яко лозу Благорозгную. Даруй им семя класяно, да всякое самодовольство имуще, изобилуют на всякое дело Благое, и тебе Благоугодное: и да узрят сыны сынов своих, яко новосаждения масличная окрест трапезы их: и Благоугодивше пред тобою, возсияют яко светила на Небеси, в тебе Господе нашем. с тобою же слава, держава, честь и поклонение, безначальному твоему отцу, и животворящему твоему Духу, ныне и присно, и во веки веков.
Лик: Аминь.
Диакон: Господу помолимся.
Лик: Господи помилуй.
И паки Священник молитву сию глаголет велегласно:
Боже святый, создавый от персти человека, и от ребра его возсоздавый жену, и спрягий ему помощника по нему, за еже тако годно бысть твоему величеству, не единому быти человеку на земли: сам и ныне Владыко, низпосли руку твою от святаго жилища твоего, и сочетай раба твоего сего, имярек, и рабу твою сию, имярек, зане от тебе сочетавается мужу жена. сопрязи я в единомудрии, венчай я в плоть едину, даруй има плод чрева, Благочадия восприятие.
Яко твоя держава, и твое есть Царство, и сила, и слава, отца, и Сына, и святаго Духа, ныне и присно, и во веки веков.
Лик: Аминь.
После второй и третьей молитвы совершается само венчание.
Выносятся венцы, и священник возлагает сначала венец на главу жениха, говоря: «Венчается раб Божий (имя) рабе Божией (имя) во имя Отца, и Сына, и Святаго Духа, аминь».
Затем возлагает венец на невесту с аналогичными словами.
Затем благословляет их трижды, говоря: «Господи Боже наш, славою и честию венчай я».
Обычно бывает так: священник говорит эти слова, воздевая руки, обращаясь к алтарю, потом поворачивается и благословляет брачующихся.
После этого сразу же возглашается прокимен: «Положил еси на главах их венцы, от камений честных, живота просиши у Тебе, и дал еси им».
И читается Апостол к Ефесянам, который и мужья и жены должны очень хорошо знать.
Братие Благодаряще всегда о всех, о имени Господа нашего Иисуса Христа, Богу и отцу: Повинующеся друг другу в страсе Божии. Жены своим мужем повинуйтеся, якоже Господу: зане муж глава есть жены, якоже и Христос глава Церкве, и той есть Спаситель тела. Но якоже Церковь повинуется Христу, такожде и жены своим мужем во всем. Мужие, любите своя жены, якоже и Христос возлюби Церковь, и себе предаде за ню: Да освятит ю, очистив банею водною в глаголе. Да представит ю себе славну Церковь, не имущу скверны, или порока, или нечто от таковых: но да есть свята и непорочна. Тако должни суть мужие любити своя жены, яко своя телеса: любяй бо свою жену, себе самаго любит. Никтоже бо когда свою плоть возненавиде, но питает и греет ю, якоже и Господь Церковь: зане уди есмы тела его, от плоти его, и от костей его. Сего ради оставит человек
отца своего и матерь, и прилепится к жене своей, и будета два в плоть едину: Тайна сия велика есть: аз же глаголю во Христа, и во Церковь. Обаче и вы по единому, кийждо свою жену сице да любит, якоже и себе: а жена да боится своего мужа.
Аллилуиа.
Стих: Ты Господи сохраниши ны и соблюдеши ны от рода сего, и во век.
Диакон: Премудрость, прости, услышим святаяго Евангелия чтение.
Евангелие от иоанна, зачало 6.
Во время оно, брак бысть в Кане Галилейстей, и бе Мати Иисусова ту. Зван же бысть Иисус и ученицы его на брак. И не доставшу вину, глагола Мати Иисусова к нему: вина не имут. Глагола ей Иисус: что есть мне и тебе, жено? не у прииде час мой. Глагола Мати его слугам: еже аще глаголет вам, сотворите. Беху же ту водоносы каменни шесть, лежаще по очищению иудейску, вместящия по двемаили трием мерам. Глагола им Иисус: наполните водоносы воды. и наполниша их до верха. И глагола им: почерпите ныне, и принесите архитриклинови. и принесоша. Якоже вкуси архитриклин вина бывшаго от воды, [и не ведяше откуду есть: слуги же ведяху почерпшии воду: ] пригласи жениха архитриклин, И глагола ему: всяк человек прежде доброе вино полагает, и егда упиются, тогда хуждшее: ты же соблюл еси доброе вино доселе. Се сотвори начаток знамением Иисус в кане галилейстей, и яви славу свою, и вероваша в него ученицы его.
Диакон: Рцем вси от всея души и от всего помышления нашего рцем.
И далее сугубая ектенья.
Священник молитву сию:
Господи Боже наш, во Спасительном Твоем смотрении, сподобивый в кане галилейстей, честный показати брак твоим пришествием, Сам ныне рабы твоя, имярек, и имярек яже Благоволил еси сочетаватися друг другу, в мире и единомыслии сохрани: честный их брак покажи, нескверное их ложе соблюди, непорочное их сожительство пребывати Благоволи, и сподоби я в старости маститей достигнути, чистым сердцем делающя заповеди твоя.
Ты бо еси Бог наш, Бог еже миловати и Спасати, и тебе славу возсылаем, со безначальным твоим Отцем, и Всесвятым, и Благим, и животворящим Твоим Духом, ныне и присно, и во веки веков.
Хор: Аминь.
Диакон: Заступи, Спаси, помилуй и сохрани нас Боже, твоею благодатию.
Хор: Господи помилуй.
Дне всего совершенна, свята, мирна и безгрешна у Господа просим:
Хор: Подай, Господи.
Диакон: Ангела мирна, верна наставника, хранителя душ и телес наших, у Господа просим.
Хор: Подай, Господи.
Диакон: Прощения и оставления грехов и прегрешений наших у Господа просим.
Хор: Подай, Господи.
Диакон: Добрых и полезных душам нашим и мира мирови у Господа просим.
Хор: Подай, Господи.
Диакон: Прочее время живота нашего в мире и покаянии скончати у Господа просим.
Хор: Подай, Господи.
Диакон: Христианския кончины живота нашего безболезненны, непостыдны, мирны и добраго ответа на Страшнем судищи Христове просим.
Хор: Подай, Господи.
Диакон: Соединение веры и причастие Святаго Духа испросивше, сами себе, и друг друга, и весь живот наш, Христу Богу предадим
Хор: Тебе, Господи.
Священник возглашает:И сподоби нас Владыко, со дерзновением неосужденно смети призывати тебе Небеснаго Бога отца, и глаголати:
Собравшиеся поют «Отче наш».
Священник возглашает: Яко твое есть Царство и сила и слава, Отца и Сына и Святаго Духа, ныне и присно и во веки веков
Хор: Аминь
Иерей: Мир всем.Главы ваша Господеви приклоните.
Таже приносится общая чаша, и Благословляет ю Священник, и глаголет молитву сию:
Диакон: Господу помолимся.
Иерей: Боже, вся сотворивый крепостию твоею, и утвердивый вселенную, и украсивый венец всех сотворенных от тебе, и чашу общую сию подаваяй сочетавающимся ко общению брака, благослови благословением Духовным. Яко Благословися Твое Имя, и прославися Твое Царство ныне и присно и во веки веков
Лик: Аминь.
После того как молодые в знак того, что они будут пить общую чашу и радостей, и скорбей жизни, трижды отпивают из общей чаши
произносится короткая молитва, а потом священник берет Крест, берет епитрахилью руки жениха и невесты, и начинается очень красивое и торжественное шествие вокруг аналоя с пением тропарей. Первый тропарь: «Исаия ликуй, Дева имет во чреве, и роды сына Еммануила, Бога же и человека, Восток имя Ему: Егоже величающе, Деву ублажаем».
Потом поется: «Святии мученицы, добре страдальчествовавшии, и венчавшиися, молитеся ко Господу, помиловатися душам нашим». И последний тропарь: «Слава Тебе Христе Боже, апостолов похвало, мучеников радование, ихже проповедь, Троица Единосущная».
Потом священник снимает венцы с молодых и говорит еще две молитвы.
Снимая венец жениха, говорит:
Возвеличися женише якоже Авраам, и благословися якоже Исаак, и умножися якоже Иаков, ходяй в мире, и делаяй в правде заповеди Божия.
И венец невесты: И ты невесто, возвеличися якоже Сарра, и возвеселися якоже Ревекка, и умножися якоже Рахиль. веселящися о своем муже, хранящи пределы закона, зане тако Благоволи Бог.
Диакон: Господу помолимся.
Лик: Господи помилуй.
Священник молитву:
Боже Боже наш, пришедый в Кану Галилейскую, и тамошний брак благословивый, благослови и рабы твоя сия, твоим промыслом ко общению брака сочетавшияся: благослови их входы и исходы, умножи во благих живот их: восприими венцы их в Царствии твоем, нескверны, и непорочны, и ненаветны соблюдаяй, во веки веков.
Лик: Аминь.
Священник: Мир всем.
Главы ваша Господеви приклоните.
Последняя молитва очень важная, она говорится лицом не к алтарю, а к брачующимся:
«Отец, Сын, и Святый Дух, Всесвятая и Единосущная, и Живоначальная Троица, едино Божество и Царство, да благословит вас, и да подаст вам долгожитие, благочадие, преспевание живота и веры, и да исполнит вас всех сущих на земли благих: да сподобит вас и обещанных благ восприятия, молитвами святыя отцы, и всех святых, аминь».
Таже входят, и поздравляют их, и целование друг друга, и бывает от священника совершенный отпуст.
Рекшу диакону: Премудрость.
Лик: Честнейшую херувим:
Отпуст: Иже в Кане Галилейстей пришествием своим честен брак показавый, Христос истинный Бог наш, молитвами пречистыя своея Матере, святых славных и всехвальных апостол, святых Боговенчанных царей и равноапостолов, Константина и Елены, святаго великомученика Прокопиа, и всех святых, помилует и спасет нас, яко Благ и Человеколюбец.
