Великая пятница. Что поется в этот день в храме. Утреня Великой Субботы. Чин выноса Плащаницы.

Во святую и Великую Субботу

клеплет ко Утрени в седмый час нощи. Начинаем Утреню по обычаю. И по шестопсалмии ектениа великая.

На Бог Господь: тропарь, глас 2:

Благообразный Иосиф с древа снем Пречистое Тело Твое, плащаницею чистою обвив и благоуханьми, во гробе нове покрыв положи.

Слава: Егда снизшел еси к смерти, Животе безсмертный, тогда ад умертвил еси блистанием Божества: егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.

И ныне: Мироносицам женам, при гробе представ, Ангел вопияше: мира мертвым суть прилична, Христос же истления явися чуждь.

И, кадящу священнику весь храм, начинаем пети Непорочны со сладкопением: такожде по коемуждо стисе и похвалы.

И абие поем тропари сия, во глас 5:

Благословен еси, Господи, научи мя оправданием Твоим.

Ангельский собор удивися, зря Тебе в мертвых вменившася, смерти же, Спасе, крепость разоривша, и с Собою Адама воздвигша, и от ада вся свобождша.

Благословен еси, Господи:

Почто мира с милостивными слезами, о ученицы, растворяете? Блистаяся во гробе Ангел мироносицам вещаше: видите вы гроб и уразумейте, Спас бо воскресе от гроба.

Благословен еси, Господи:

Зело рано мироносицы течаху ко гробу Твоему рыдающия, но предста к ним Ангел и рече: рыдания время преста, не плачите: Воскресение же апостолом рцыте.

Благословен еси, Господи:

Мироносицы жены, с миры пришедшия ко гробу Твоему, Спасе, рыдаху, Ангел же к ним рече, глаголя: что с мертвыми Живаго помышляете? Яко Бог бо воскресе от гроба.

Слава, Троичен: Поклонимся Отцу, и Его Сынови, и Святому Духу, Святей Троице во Едином Существе, с Серафимы зовуще: Свят, Свят, Свят еси, Господи.

И ныне, Богородичен: Жизнодавца рождши, греха, Дево, Адама избавила еси, радость же Еве в печали место подала еси: падшия же от жизни к сей направи из Тебе воплотивыйся Бог и Человек.

Аллилуиа, трижды.

Таже ектениа малая.

Возглас: Ты бо еси Царь мира, Христе Боже наш, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно, и во веки веков.

И поем седален дне, глас 1.
Подобен: Гроб Твой, Спасе:

Плащаницею чистою и ароматы Божественными Тело Честное, испросив у Пилата, Иосиф миропомазует и полагает в нове гробе. Темже утру пришедша, мироносицы жены возопиша: покажи нам, якоже предрекл еси, Христе, Воскресение.

Слава, конец.
И ныне, другий подобен:

Ужасошася лицы Ангельстии, зряще Седящаго в недрех Отчих: како, яко мертв, во гроб полагается Безсмертный! Егоже чини Ангельстии окружают и славят с мертвыми во аде, яко Зиждителя и Господа.

Таже бывает чтение во Евангелии толковом, от Матфеа, зачало 114: Во утрий же день, иже есть по пятце: Воскресение Христово: не глаголем. Но абие псалом 50. И поем канон, ирмос по дважды, тропари на 12: и паки последи ирмос оба лика вкупе. Есть же канон, от первыя песни до шестыя, творение Марка монаха, епископа Идрунтскаго: ирмосы же творение жены некия, Кассии именуемыя. От 6-я же песни до конца творение господина Космы. Краегранесие же канона: Каи симерон де Савватон мелпо Мега. Сиесть: И днесь же Субботу пою Великую. Глас 6.

Песнь 1.

Ирмос: Волною морскою скрывшаго древле гонителя мучителя, под землею скрыша спасенных отроцы: но мы, яко отроковицы, Господеви поим: славно бо прославися.

 Господи, Боже мой! Исходное пение и надгробную Тебе песнь воспою, погребением Твоим жизни моея входы отверзшему и смертию смерть и ад умертвившему.

 Горе Тя на Престоле и доле во гробе, премирная и подземная, помышляющая, Спасе мой, зыбляхуся умерщвлением Твоим: паче ума бо виден был еси мертв, Живоначальниче.

 Да Твоея славы вся исполниши, сшел еси в нижняя земли: от Тебе бо не скрыся состав мой, иже во Адаме, и погребен, истлевша мя обновляеши, Человеколюбче.

Песнь 3.

Ирмос: Тебе, на водах повесившаго всю землю неодержимо, тварь, видевше на лобнем висима, ужасом многим содрогашеся: несть свят, разве Тебе, Господи, взывающи.

 Образы погребения Твоего показал еси, видения умножив. Ныне же сокровенная Твоя богомужно уяснил еси и сущим во аде, Владыко: несть свят, разве Тебе, Господи, взывающим.

 Простерл еси длани и соединил еси древле разстоящаяся. Одеянием же, Спасе, еже в плащанице и во гробе, окованныя разрешил еси: несть свят, разве Тебе, Господи, взывающия.

 Гробом и печатьми, Невместиме, содержимь был еси хотением: ибо силу Твою действы показал еси, богодейственно поющим: несть свят, разве Тебе, Господи Человеколюбче.

Седален, глас 1:

Гроб Твой, Спасе, воини стрегущии мертви от облистания явльшагося Ангела быша, проповедающа женам Воскресение. Тебе славим, тли потребителя! Тебе припадаем, Воскресшему из гроба и Единому Богу нашему!

Слава, и ныне, тойже.

Песнь 4.

Ирмос: На кресте Твое Божественное истощание провидя, Аввакум, ужасся, вопияше: Ты сильных пресекл еси державу, Блаже, приобщаяся сущим во аде, яко Всесилен.

 Седмый день днесь освятил еси, егоже древле благословил еси упокоением дел: преводиши бо всяческая и обновляеши, субботствуя, Спасе мой, и назидая.

 Силою лучшаго, победившаго Тебе, от плоти душа Твоя разделися, растерзающи бо обоя узы – смерти и ада, Слове, державою Твоею.

 Ад, Слове, срет Тя, огорчися, человека зря обожена, уязвлена ранами и Всесильнодетеля, страшным же зраком погибе.

Песнь 5.

Ирмос: Богоявления Твоего, Христе, к нам милостивно бывшаго, Исаиа, Свет видев Невечерний, из нощи утреневав, взываше: воскреснут мертвии и востанут сущии во гробех, и вси земнороднии возрадуются.

 Новотвориши земныя, Создателю, перстен быв, и плащаница и гроб являют еже в Тебе, Слове, таинство. Благообразный бо советник Тебе Рождшаго совет образует, в Тебе велелепно новотворящаго мя.

 Смертию – смертное, погребением – тленное прелагаеши: нетленно твориши бо, боголепно безсмертно творя приятие, плоть бо Твоя истления не виде, Владыко, ниже душа Твоя во аде страннолепно оставлена бысть.

 Из Небрачныя прошед и прободен в ребра, Содетелю мой, из Нея соделал еси обновление Евино, Адам быв, уснув паче естества сном естественным и жизнь воздвигнув от сна и тления, яко Всесилен.

Песнь 6.

 Ирмос: Ят бысть, но не удержан в персех китовых Иона: Твой бо образ нося, Страдавшаго и погребению давшагося, яко от чертога, от зверя изыде: приглашаше же кустодии: хранящии суетная и ложная, милость сию оставили есте.

 Биен был еси, но не разделился еси, Слове, еяже причастился еси плоти: аще бо и разорися Твой храм во время страсти, но и тако един бе состав Божества и плоти Твоея. Во обоих бо Един еси Сын, Слове Божие, Бог и Человек.

 Человекоубийственно, но не богоубийственно бысть прегрешение Адамово: аще бо и пострада Твоея плоти перстное существо, но Божество безстрастно пребысть, тленное же Твое на нетление преложил еси и нетленныя жизни показал еси источник Воскресением.

 Царствует ад, но не вечнует над родом человеческим: Ты бо, положся во гробе, Державне, живоначальною дланию, смерти ключи развергл еси и проповедал еси от века тамо спящим избавление неложное, быв, Спасе, мертвым первенец.

Кондак, глас 6:

Бездну заключивый мертв зрится, и смирною, и плащаницею обвився, во гробе полагается, яко смертный, Безсмертный: жены же приидоша помазати Его миром, плачущия горько и вопиющия: сия Суббота есть преблагословенная, в нейже Христос, уснув, воскреснет тридневен.

Икос: Содержай вся на Крест вознесеся, и рыдает вся тварь. Того видящи нага висяща на древе, солнце лучи сокры, и звезды отложиша свет: земля же со многим страхом поколебася, и море побеже, и камение распадеся, гроби же многи отверзошася, и телеса восташа святых мужей. Ад низу стенет, и иудее советуют оклеветати Христово Воскресение. Жены же взывают: сия Суббота есть преблагословенная, в нейже Христос, уснув, воскреснет тридневен.

Синаксарий. Стихи:

Всуе храниши гроб, кустодие:

Не удержит бо рака Самосущую Жизнь.

Во святую и Великую Субботу празднуем боготелесное погребение и во ад сошествие Господа Бога и Спаса нашего Иисуса Христа, имиже наш род, от тления воззван быв, к вечней жизни прейде. Вся убо дни святая Четыредесятница превосходит: тоя же паки больши есть сия святая и великая седмица: великия же седмицы паки больши есть сия Великая и святая Суббота. Глаголется же великая седмица, не яко больши суть дние сии, или часы. но яко великая и преестественная чудеса и изрядная Спаса нашего дела в ней содеяшася, и наипаче днесь. Якоже бо в первом миротворении, всякое дело соделав Бог, и последи главнейшее, в шестый день создав человека, в седмый почи от всех дел Своих, и освяти его, субботу именовав, яже упокоение толкуется: сице и во умнаго мира делании, изрядно вся соделав, и в шестый день паки возсоздав истлевшаго человека, и обновив живоносным Крестом и смертию, в настоящий седмый день упокоися совершенным от дел упокоением, уснув животворным и спасительным сном. Снизходит убо Божие Слово с плотию во гроб, сходит же и во ад с нетленною и Божественною Своею душею, раздельшеюся в смерти от телесе, юже и в руце предаде Отцу, Емуже не просившу и Свою Кровь принесе, избавление нам бывшую. Во аде бо Господня душа, якоже других святых души, не бысть удержана. Како бо? Отнюд не подлежащи прародительней клятве якоже оны. Но и Крови, еюже куплени быхом, не взят враг наш диавол, аще и держаше нас. Како бо аще не точию от Бога? Но Бога Самаго можаше ли разбойник диявол яти? Обаче вселися во гроб Господь наш Иисус Христос телесне и с Божеством, совершенне плоти соединившимся. Бяше же с разбойником и в раи, и во аде бяше, якоже речеся, со обоженною Своею душею: преестественно же бе и со Отцом и Духом седяй, яко Бог неописанный: везде же бе, ничтоже Божеству во гробе страждущу, якоже ниже на Кресте пострада. И тление убо, еже есть разрешение души от тела, претерпе Господне Тело: растления же, сиречь разрушения плоти и удес, совершеннаго погубления никакоже. Но Иосиф убо, святое Тело Господне снем, во гробе нове близ Иерусалима в вертограде погребает, камень велий зело ко входу гроба положив. Иудее же, по пятце, приступивше, глаголют Пилату: господи, помянухом, яко льстец Оный рече, егда жив бе, яко по триех днех востану: мнится убо нам добро быти, да твоя власть повелит воинству затвердити гроб. Когда же Христос рече: востану? Мощно есть, яко и от притчи о Ионе пророце сие извождаху иудее. Отвеща же Пилат: аще убо льстец бе, что о глаголех Его печетеся? Тогда бо несумненно умре. Всяко же, глаголют безумнии, аще утвердится гроб, не украдется. Оле, како безумнии не разумеваху, яко, елика себе ради творяху, на ся творяху! Пилату же повелевшу, сами с воины и известною своею печатию затвердиша гроб, да не чуждей сущей стражи и печати, Воскресение Господне оболгано было бы. Но ад отселе содрогается и изумевает, твердейшую силу ощущая: неправеднаго убо ради поглощения Христа, твердейшаго и краеугольнаго камене, помале извержет и вся мертвыя, яже от века положи во чреве, снедь сотворив. Неизреченным снизхождением Твоим, Христе Боже наш, помилуй нас. Аминь.

Песнь 7.

 Ирмос: Неизреченное чудо, в пещи избавивый преподобныя отроки из пламене, во гробе мертв, бездыханен полагается, во спасение нас, поющих: Избавителю Боже, благословен еси.

 Уязвися ад в сердце, прием Уязвеннаго копием в ребра, и воздыхает, огнем Божественным иждиваемь во спасение нас, поющих: Избавителю Боже, благословен еси.

 Богат гроб: в себе бо приим яко спяща Содетеля, жизни Божественное сокровище показася, во спасение нас, поющих: Избавителю Боже, благословен еси.

 Законом умерших еже во гробе положение, всех приемлет Жизнь, и сего источника показует востания, во спасение нас, поющих: Избавителю Боже, благословен еси.

 Едино бяше неразлучное еже во аде, и во гробе, и во Едеме, Божество Христово со Отцем и Духом, во спасение нас, поющих: Избавителю Боже, благословен еси.

Песнь 8.

 Ирмос: Ужаснися бояйся небо, и да подвижатся основания земли: се бо в мертвецех вменяется в вышних Живый и во гроб мал странноприемлется, Егоже, отроцы, благословите: священницы, воспойте: людие, превозносите во вся веки.

 Разрушися Пречистый храм, падшую же совозставляет скинию: Адаму бо первому Вторый, Иже в вышних Живый, сниде даже до адовых сокровищ, Егоже, отроцы, благословите: священницы, воспойте: людие, превозносите во вся веки.

 Преста дерзость учеников, Аримафей же изрядствует Иосиф: мертва бо и нага зря над всеми Бога, просит и погребает зовый: отроцы, благословите: священницы, воспойте: людие, превозносите во вся веки.

 О чудес новых! О благости! О неизреченнаго терпения! Волею бо под землею печатлеется, Иже в вышних Живый, и, яко льстец, Бог оклеветается, Егоже, отроцы, благословите: священницы, воспойте: людие, превозносите во вся веки.

Песнь 9.

 Ирмос: Не рыдай Мене, Мати, зрящи во гробе, Егоже во чреве без семене зачала еси Сына: востану бо и прославлюся, и вознесу со славою непрестанно, яко Бог, верою и любовию Тя величающия.

 В страннем Твоем рождестве, болезней избежавше паче естества, ублажихся, Безначальне Сыне: ныне же Тя, Боже мой, бездыханна зрящи мертва, оружием печали растерзаюся люте: но воскресни, яко да возвеличуся.

 Земля покрывает Мя хотяща, но устрашаются адовы вратницы, одеяна видяще одеждою окровавленою, Мати, отмщения: враги бо Крестом поразив, яко Бог, воскресну паки и возвеличу Тя.

 Да радуется тварь, да веселятся вси земнороднии, враг бо пленися ад: с миры жены да сретают, Адама со Евою избавляю всеродна и в третий день воскресну.

Ексапостиларий, глас 2: Свят Господь Бог наш. [Трижды.]

Стихиры на хвалитех 4, глас 2:

Днесь содержит гроб Содержащаго дланию тварь, покрывает камень Покрывшаго добродетелию небеса: спит Живот, и ад трепещет, и Адам от уз разрешается. Слава Твоему смотрению, имже совершив все упокоение вечное, даровал еси нам, Боже, всесвятое из мертвых Твое Воскресение.

Что зримое видение? Кое настоящее упокоение? Царь веков, Иже страстию совершив смотрение, во гробе субботствует, новое нам подая субботство. Тому возопиим: воскресни, Боже, судяй земли, яко Ты царствуеши во веки, неизмерную имея и велию милость.

Приидите, видим Живот наш, во гробе лежащь, да во гробех лежащия оживит. Приидите днесь, Иже из Иуды спяща зряще, пророчески Ему возопиим: возлег уснул еси, яко лев, кто воздвигнет Тя, Царю? Но востани самовластно, давый Себе о нас волею, Господи, слава Тебе.

Глас 6: Проси Иосиф тело Иисусово и положи е в новем своем гробе: подобаше бо Ему из гроба, яко из чертога, проити. Сокрушивый державу смерти и отверзый врата райская человеком, Господи, слава Тебе.

Слава, глас 6: Днешний день тайно великий Моисей прообразоваше, глаголя: и благослови Бог день седмый. Сия бо есть благословенная Суббота. Сей есть упокоения день, воньже почи от всех дел Своих Единородный Сын Божий, смотрением еже на смерть плотию субботствовав: и во еже бе, паки возвращься Воскресением, дарова нам живот вечный, яко Един Благ и Человеколюбец.

И ныне, Богородичен, глас 2: Преблагословена еси, Богородице Дево:

Славословие великое. Священник же облачается во всю священническую одежду и, окадив плащаницу трижды, идет под плащаницею со святым Евангелием окрест храма, певаему Трисвятому. По Трисвятом же, став пред царскими враты, священник глаголет: Премудрость. И мы тропарь единожды: Благообразный Иосиф:

И глаголем тропарь пророчества, глас 2:

Содержай концы, гробом содержатися изволил еси, Христе, да от адова поглощения избавиши человечество и, воскрес, оживиши нас, яко Бог Безсмертный.

Слава, конец. И ныне, весь.

Таже прокимен, глас 4: Воскресни, Господи, помози нам и избави нас имене ради Твоего. Стих: Боже, ушима нашима услышахом, и отцы наши возвестиша нам.

Пророчества Иезекиилева чтение. [Глава 37, ст. 1 – 14.]

Бысть на мне рука Господня, и изведе мя в дусе Господни, и постави мя среде поля: се же бяше полно костей человеческих. И обведе мя окрест их около, и се многи зело на лицы поля, и се сухи зело. И рече ко мне: сыне человечь, оживут ли кости сия? И рекох: Господи Боже, Ты веси сия. И рече ко мне: сыне человечь, прорцы на кости сия, и речеши им: кости сухия, слышите слово Господне, ее глаголет Адонаи Господь костем сим: ее Аз введу в вас дух животен, и дам на вас жилы, и возведу на вас плоть, и простру по вам кожу, и дам дух Мой в вас, и оживете, и увесте, яко Аз есмь Господь. И прорекох, якоже заповеда ми Господь. И бысть глас внегда ми пророчествовати, и се трус, и совокупляхуся кости, кость к кости, каяждо к составу своему. И видех, и се быша им жилы, и плоть растяше и восхождаше, [и протяжеся] им кожа верху, духа же не бяше в них. И рече ко мне: прорцы о дусе, прорцы, сыне человечь, и рцы духови: сия глаголет Адонаи Господь: от четырех ветров прииди, душе, и вдуни на мертвыя сия, и да оживут. И прорекох, якоже повеле ми: и вниде в ня дух жизни, и ожиша, и сташа на ногах своих, собор мног зело. И рече Господь ко мне, глаголя: сыне человечь, сия кости весь дом Израилев есть, тии бо глаголют: сухи быша кости наша, погибе надежда наша, убиени быхом. Того ради прорцы, [сыне человечь], и рцы к ним: сия глаголет Адонаи Господь: ее Аз отверзу гробы ваша, и изведу вас от гроб ваших, людие Мои, и введу вы в землю Израилеву. И увесте, яко Аз есмь Господь, внегда отверсти Ми гробы ваша, еже возвести Ми вас от гробов ваших, людие Мои: и дам дух Мой в вас, и живи будете. И поставлю вы на земли вашей, и увесте, яко Аз Господь: глаголах, и сотворю, глаголет Адонаи Господь.

Прокимен, глас 7: Воскресни, Господи Боже мой, да вознесется рука Твоя, не забуди убогих Твоих до конца. Стих: Исповемся Тебе, Господи, всем сердцем моим, повем вся чудеса Твоя.

Апостол к Коринфянам, зачало 133:

Братие, мал квас все смешение квасит. Очистите убо ветхий квас, да будете ново смешение, якоже есте безквасни: ибо Пасха наша за ны пожрен бысть Христос. Темже да празднуем не в квасе ветсе, ни в квасе злобы и лукавства, но в безквасиих чистоты и истины.* Христос ны искупил есть от клятвы законныя, быв по нас клятва: писано бо есть: проклят всяк висяй на древе: да в языцех благословение Авраамле будет о Христе Иисусе, да обетование Духа приимем верою. [* Галат., зач. 206.]

Аллилуиа, глас 5: Да воскреснет Бог, и расточатся врази Его, и да бежат от Лица Его ненавидящии Его. Стих: Яко исчезает дым, да исчезнут, яко тает воск от лица огня. Стих: Тако да погибнут грешницы от Лица Божия, а праведницы да возвеселятся.

Евангелие от Матфеа, зачало 114: Во утрий день, иже есть по пятце: Конец: С кустодиею. Таже ектениа: Рцем вси: и Исполним утреннюю молитву нашу: Такожде и прочая, яко обычно. И отпуст. И бывает целование плащаницы: певцы же поют стихиру, глас 5:

Приидите, ублажим Иосифа приснопамятнаго, в нощи к Пилату пришедшаго и Живота всех испросившаго. Даждь ми Сего страннаго, Иже не имеет где главы подклонити: даждь ми Сего страннаго, Егоже ученик лукавый на смерть предаде: даждь ми Сего страннаго, Егоже Мати, зрящи на Кресте висяща, рыдающи вопияше и матерски восклицаше: увы Мне, Чадо Мое! Увы Мне, Свете Мой и утробе Моя возлюбленная! Симеоном бо предреченное в церкви днесь собысться: Мое сердце оружие пройде, но в радость Воскресения Твоего плач преложи. Покланяемся Страстем Твоим, Христе: покланяемся Страстем Твоим, Христе: покланяемся Страстем Твоим, Христе, и Святому Воскресению.

Первый же час поется в притворе: третий же час, шестый и девятый поются вкупе просто в притворе с блаженными во свое время.